204. นํมฺหิ ติจตุนฺน+มิตฺถิยํ ติสฺส+จตสฺสา

นํมฺหิ ติจตุนฺนํ ติสฺส+จตสฺสา โหนฺติ+ตฺถิยํ ยถากฺกมํฯ นํมฺหีติ จตุตฺถีฉฏฺฐีนํ สามญฺญวจนํ, โน เจ นํสูติ วทติ, ยถากฺกมํติ สทฺททฺวยาเปกฺขํฯ เอว+มีทิส+มญฺญมฺปิฯ ติสฺสนฺนํ ตีสุฯ

206. ตีณิ+จตฺตาริ นปุํสเก

โยมฺหิ สวิภตฺตีนํ ติจตุนฺนํ ยถากฺกมํ ตีณิ+จตฺตาริ โหนฺติ นปุํสเกฯ ตีณิ, ตีณิ, ตีหิ อิจฺจาทิ ปุลฺลิงฺเควฯ

จตุ โย,

208. จตุโร วา จตุสฺส

จตุสฺส สวิภตฺติสฺส โยมฺหิ จตุโร โหติ วา ปุลฺลิงฺเคฯ จตุโร จตฺตาโรฯ กถํ ‘‘จตุโร นิมิตฺเต นาทฺทสาสิ’’นฺติ, ลิงฺควิปลฺลาเสน สิทฺธํ, จตฺตาริ นิมิตฺตานีติ อตฺโถฯ วิปลฺลาโส ติวิโธ ลิงฺควิปลฺลาโส วจนวิปลฺลาโส วิภตฺติวิปลฺลาโสติฯ จตูหิ จตูภิฯ จตุนฺนํ, จตูสุฯ

อิตฺถิยํ จตสฺโสฯ จตสฺโสฯ จตูหิ จตูภิฯ จตสฺสนฺนํฯ จตสฺสนฺนํฯ จตูสุฯ

นปุํสเก จตฺตาริฯ จตฺตาริฯ จตูหิ จตูภิฯ อิจฺจาทิ ปุเมวฯ

169. ฏ ปญฺจาทีหิ จุทฺทสหิ

‘‘สุตฺเต ลิงฺควจนมตฺต’’นฺติ ญายา ฏ-อิติ วุตฺตํฯ ปญฺจาทีหิ จุทฺทสหิ สงฺขฺยาหิ โยนํ ฏ โหติฯ ปญฺจฯ ปญฺจฯ โยนํ ฏา+เฏนิวตฺถนตฺถํ ฏ-วิธานํฯ

90. ปญฺจาทีนํ จุทฺทสนฺน+ม

ปญฺจาทีนํ จุทฺทสนฺนํ สุนํหิสฺว โหติฯ เอตฺต+ทีฆาปวาโท+ยํฯ อปวาทติ พาเธตีติ อปวาโทฯ ตสฺมา ‘‘ปกปฺยาปวาทวิสยมุสฺสคฺคา อภินิวิสนฺเต’’ติ ญายา ‘‘สุหิสฺว+สฺเส’’ ‘‘สุนํหิสุ’’ติ จ อุสฺสคฺคา ‘‘ปญฺจาทีนํ จุทฺทสนฺน+ม’’ อิติ อปวาทวิสยํ น ปวิสนฺติ, สามญฺญตฺตาฯ เอว+มุปริปิ ‘‘ปญฺจมิยํ ปรสฺส’’ ‘‘อาทิสฺสา’’ติฯ ปญฺจหิ ปญฺจภิ ปญฺจนฺนํฯ ปญฺจนฺนํฯ ปญฺจสุฯ เอวํ ฉาทโย อฏฺฐารสนฺตาฯ

‘‘จตฺเถ’’ติ เอโก จ ทส จาติ จตฺตสมาเส ‘‘อมาที’’ติ เอเกน อธิกา ทสาติ ตติยาสมาเส วา กเต ‘‘เอกตฺถตาย’’นฺติ วิภตฺติโลโปฯ เอว+มุปริ จฯ

3,102. เอกฏฺฐาน+มา

เอกอฏฺฐานํ อา โหติ ทเส ปเรฯ

3,103. ร สํขฺยาโต วา

สํขฺยาโต ปรสฺส ทสสฺส ร โหติ วิภาสาฯ ส จ ‘‘ปญฺจมิยํ ปรสฺสา’’ติ วตฺตมาเน ‘‘อาทิสฺสา’’ติ ทการสฺเสว โหติฯ เอการส เอกาทสฯ เอการสหิ เอกาทสหิฯ เอการสนฺนํ เอกาทสนฺนํฯ เอการสสุ เอกาทสสุฯ เอว+เมกาทสอิจฺจาทิปิฯ

3,94. อา สํขฺยายา สตาโท นาญฺญตฺเถ

สํขฺยาย+มุตฺตรปเท ทฺวิสฺสา โหติ อสตาโท นาญฺญตฺเถฯ

อาวิฏฺฐลิงฺคตฺตา สํขฺยายํ อุตฺตรปเท สลิงฺเคเนว วิเสสนํ ภวติฯ

สุทฺธํ มิสฺสญฺจ สํกิณฺณํ, อุปสชฺชนเมว จ;

อาวิฏฺฐ+มถ วา+พฺยตฺตํ, ฉธา ลิงฺคํ วิวํยเตฯ

เอตฺถ ยถากฺกมํ รุกฺโข ลตา ปณฺณํติ สุทฺธํฯ ฆโฏ ฆฏี, วชิโร วชิรํ, เวทนา เวทนํติ มิสฺสํฯ ตโฏ ตฏี ตฏํติ สํกิณฺณํฯ สุกฺโก ปโฏ, สุกฺกา ปฏิ, สุกฺกํ วตฺถํติ อุปสชฺชนํฯ ราชา สรณํ, คุโณ ปมาณํติ อาวิฏฺฐํฯ ตุวํ อหํ กติ ปญฺจาติ อพฺยตฺตํฯ อิติ ลิงฺคํ เวทิตพฺพํฯ ทฺวาทสฯ

3,98. พา จตฺตาลีสา โท

ทฺวิสฺส พา วา โหติ จตฺตาลีสา โท นาญฺญตฺเถฯ ราเท เส พารสฯ

3,95. ติสฺเส

สํขฺยาย+มุตฺตรปเท ติสฺส เอ โหต+สตาโท นา+ญฺญตฺเถฯ

3,104. ฉตีหิ โฬ จ

ฉตีหิ ปรสฺส ทสสฺส โฬ โหติ โร จฯ เตฬส เตรสฯ

3,100. จตุสฺส จุโจ ทเส

จตุสฺส จุ+โจ โหนฺติ วา ทเส ปเรฯ ทฺวิตฺเต จุทฺทส โจทฺทส จตุทฺทสฯ

3,99. วีสติทเสสุ ปญฺจสฺส ปณฺณ+ปนฺนา

วีสติ เสสุ ปเรสุ ปญฺจสฺส ปณฺณ+ปนฺนา โหนฺติ ยถากฺกมํฯ ปนฺนรส ปญฺจทสฯ

3,101. ฉสฺส โส

ฉสฺส โส-อิจฺจ+ย+มาเทโส โหติ เส ปเรฯ โสฬส โสรสฯ สตฺตรส สตฺตทสฯ ‘‘เอกฏฺฐาน+มา’’ติ อา, อฏฺฐารส อฏฺฐาทสฯ

อูนา จ สา วีสติ จาติ ‘‘วิเสสน+เมกตฺเถเน’’ติ วิเสสนสมาเส ‘‘อิตฺถิยํ ภาสิตปุมิ+ตฺถี ปุเม+เวกตฺเถ’’ติ ปุมตฺเต จ กเต เอเกน อูนา วีสตีติ ตติยาสมาเส เอกูนวีสติฯ

วีสติอาทโย อานวุติยา อิตฺถิลิงฺเค+กวจนาฯ โภ เอกูนวีสติฯ เอกูนวีสติํฯ เอกูนวีสตฺยา เอกูนวีสติยาฯ เอกูนวีสตฺยํ เอกูนวีสติยํ เอกูนวีสตฺยา เอกูนวีสติยาฯ มติสมํฯ

เอวํ วีสติ, เอกวีสติ, ทฺวาวีสติ พาวีสติ, เตวีสติ จตุวีสติปฺปภุตโยฯ ปณฺณอาเทเส ปณฺณวีสติ ปญฺจวีสติฯ เอวํ ฉพฺพีสติ, สตฺตวีสติ, อฏฺฐวีสติฯ

เอเกน อูนา ติํสติ ติํสา วาติ เอกูนติํสติ เอกูนติํสา วาฯ กรเณ เอกูนติํสายฯ เอกูนติํสาย, เอกูนติํสาย, เอกูนติํสาย, เอกูนติํสายํฯ